புத்ராஜெயா, ஜூன் 05 (பெர்னாமா) -- நாட்டின் தரவுகளின் பாதுகாப்பு மற்றும் இறையாண்மையை உறுதி செய்ய, இலக்கவியல் சேவைகளின் மேம்பாட்டை அரசாங்கம் உள்நாட்டிலேயே நிர்வகிக்க வேண்டும் என்று அமைச்சரவைக் கூட்டத்தில் தீர்மானிக்கப்பட்டது.
இந்த மேம்பாட்டின் அம்சங்களை, குறிப்பாக தேசிய இலக்கவியல் துறை மூலம், இலக்கவியல் அமைச்சு ஒருங்கிணைக்கும் என்று தொடர்பு அமைச்சர் டத்தோ ஃபஹ்மி ஃபட்சில் தெரிவித்தார்.
''இது தரவுப் பாதுகாப்பு மற்றும் தரவு இறையாண்மை அம்சங்களைக் கருத்தில் கொள்கிறது. குறிப்பாக அரசு ஊழியர்களிடையே, மூலக் குறியீட்டிற்கான நேரடி அணுகல் மற்றும் திறன் மேம்பாடாகும்,'' என்றார் அவர்.
இன்று, புத்ராஜெயாவில், அமைச்சரவைக்கு பிந்தைய செய்தியாளர்கள் சந்திப்பில் அவர் அவ்வாறு குறிப்பிட்டார்.
இதனிடையே, உள்ளூர் வணிக நடவடிக்கைகளை சட்டவிரோதமாகக் கைப்பற்றும் வெளிநாட்டினர் மீது கடுமையான அமலாக்க நடவடிக்கை எடுக்குமாறு அதிகாரிகளுக்கு உத்தரவிடப்பட்டுள்ளதாக Datuk Fahmi Fadzil தெரிவித்தார்.
உள்ளூர் வணிக நடவடிக்கைகளை வெளிநாட்டினர் கைப்பற்றுவது குறித்த புகார்களைத் தொடர்ந்து, இன்றைய அமைச்சரவைக் கூட்டத்தில் பிரதமர் இந்த விவகாரத்தை எழுப்பியதாக தொடர்பு அமைச்சரான அவர் கூறினார்.
''மலேசியக் குடிமக்கள் உட்பட, சட்ட விதிகளை மீறி, வழங்கப்பட்ட உரிமங்கள், விசாக்கள் அல்லது வணிக வசதிகளைத் தவறாகப் பயன்படுத்தியதாகக் கண்டறியப்படும் எந்தவொரு தரப்பினர் மீதும் கடுமையான அமலாக்க நடவடிக்கை எடுக்கப்பட வேண்டும் என்று பிரதமர் உத்தரவிட்டுள்ளார்,'' என்றார் அவர்.
சட்டத்தின் அடிப்படையில் நடவடிக்கை எடுக்கும் பொறுப்பு சம்பந்தப்பட்ட அதிகாரிகளிடம் ஒப்படைக்கப்பட்டுள்ளதாக Datuk Fahmi தெரிவித்தார்.
இந்த விவகாரத்தில் அரசாங்கம் எந்தவித சமரசமும் கொள்ளாது என்றும், அனைத்து வர்த்தகர்களும், குறிப்பாக செல்லுபடியாகும் வணிக உரிமங்களைக் கொண்டவர்கள், சட்டத்தைப் பின்பற்ற வேண்டும் எனவும் எச்சரிக்கை விடுக்கப்பட்டுள்ளது.
- பெர்னாமா
பெர்னாமா செய்திகள் நேரலை: மாலை 7 மணி மறுஒளிபரப்பு: இரவு 1130 (ஆஸ்ட்ரோ 502)
