கோலாலம்பூர், நவம்பர் 28 (பெர்னாமா) -- சிலாங்கூர், கோலா சிலாங்கூர் மாவட்டத்தில் தொடர்ந்து பெய்து வரும் அடைமழை மற்றும் வெள்ளப்பெருக்கைத் தொடர்ந்து Tenaga Nasional நிறுவனம் T-N-B அப்பகுதியில் மின்சார விநியோகத்தை நிறுத்தியுள்ளது.
இயற்கைப் பேரிடரால் ஜாலான் ரிசர்வ் மஸ்ஜித் மற்றும் தெற்கு ரியாலிட்டி லாடாங் புக்கிட் இஜோக் ஆகிய இரு மின்சார துணை மின்நிலையங்கள் பாதிக்கப்பட்டுள்ளதாக தனது முகநூலில் T-N-B பதிவிட்டிருந்தது.
சம்பந்தப்பட்ட பகுதியில் உள்ள பயனீட்டாளர்களின் பாதுகாப்பைக் கருத்தில் கொண்டு மின்சார விநியோகத்தை நிறுத்தியுள்ளதாக அப்பதிவில் TNB தெரிவித்திருந்தது.
மேலும், தங்களின் பகுதிகளில் உள்ள அனைத்து மின்சார விசைகளையும் அடைப்பதோடு மின்சாதனங்களின் பயன்பாட்டையும் நிறுத்திக் கொள்ளுமாறு பொதுமக்களுக்கு அறிவுறுத்தப்பட்டுள்ளது.
நீலாய் மற்றும் போர்ட் டிக்சன் உள்ளிட்ட நெகிரி செம்பிலானைச் சுற்றியுள்ள பல பகுதிகளில் புயல் மற்றும் கனமழையைத் தொடர்ந்து பல மரங்கள் விழுந்துள்ளதால் மின் விநியோகம் வழக்க நிலைக்குத் திரும்ப கூடுதல் கால அவகாசம் தேவைப்படும் என்று எதிர்பார்க்கப்படுவதாகவும் TNB குறிப்பிட்டுள்ளது.
எனவே, பலத்த காற்றல் விழுந்திருக்கும் அல்லது பழுதடைந்திருக்கும் TNB-இன் எவ்வித சாதனத்தின் அருகிலும் நெருங்க வேண்டாம் என்றும் பொதுமக்களிடம் கேட்டுக் கொள்ளப்பட்டுள்ளது.
தங்களின் பகுதியில் பழுதடைந்திருக்கும் TNB சாதனங்கள் குறித்து பொதுமக்கள் 15454 என்ற எண்ணிலோ அல்லது TNB Careline என்ற முகநூல் பக்கத்திலோ புகாரளிக்கலாம்.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
