மலாக்கா, 24 நவம்பர் (பெர்னாமா) -- மலாக்கா, அலோர் காஜாவில் உள்ள Durian Tunggal செம்பனைத் தோட்டத்தில், இன்று அதிகாலை, போலீஸ் உறுப்பினர் ஒருவரை பாரங் கத்தியால் தாக்க முயன்ற ஆடவர் உட்பட மூன்று குற்றவாளிகள் சுட்டு வீழ்த்தப்பட்டனர்.
அதிகாலை மணி 4.30-க்கு நிகழ்ந்த இச்சம்பவத்தில் KOPERAL அங்கீகாரமுடைய அந்த 30 வயது போலீசாரின் இடது கையில் பலத்த காயம் ஏற்பட்டுள்ளதாக மலாக்கா மாநில போலீஸ் தலைவர் சுல்கைரி முக்தார் தெரிவித்தார்.
''அலோர் காஜாவில் உள்ள டுரியான் துங்கால் பகுதி மற்றும் அதன் சுற்றுவட்டாரத்தில் எங்களின் படையினர் ரோந்து கண்காணிப்பு நடவடிக்கையை மேற்கொண்டனர். அப்போது குற்றவாளிகள் என்று சந்தேகப்படும் மூவர் அடங்கிய கும்பலைக் கண்டுள்ளனர். சந்தேகத்திற்குரிய அம்மூவரும் 24 முதல் 29 வயதிற்குட்பட்டவரகள். அம்மூன்று குற்றவாளிகளையும் போலீசார் தடுக்க முற்பட்ட போது அவர்கள் போலீசார் மீது தாக்குதல் நடத்தினர்.'' என்றார் டத்தோ சுல்கைரி முக்தார்.
தாக்குதலில் இருந்து தங்களைத் தற்காத்து கொள்வதற்காக போலீசார் அவர்களை நோக்கிச் சுட்டனர். சம்பவத்தில் பலியான உள்நாட்டைச் சேர்ந்த அவர்களில் இருவர் 29 மற்றும் 24 வயதுடையவர்கள் என்பது உறுதி செய்யப்பட்டுள்ள வேளையில் மற்றொருவர் அடையாள அட்டை கொண்டிருக்காததால் அவரின் வயது அறியப்படவில்லை என்று சுல்கைரி முக்தார் தெரிவித்தார்.
செம்பனைத் தோட்டத்தில் வாகனங்களை நிறுத்திவிட்டு, நடந்தே சென்று வீடுகள் கடைகள் மற்றும் தொழிற்சாலைகளைக் கொள்ளையடிப்பதை இக்கும்பல் வாடிக்கையாகக் கொண்டுள்ளது.
மேலும், அவர்களிடமிருந்து மூன்று பாராங்கத்திகள், ஒரு இரும்பை வெட்டும் கருவி மூன்று முகமூடிகள் மற்றும் மூன்று ஜோடி கையுறைகளை போலீசார் பறிமுதல் செய்ததாக செய்தியாளர் சந்திப்பில் சுல்கைரி முக்தார் விவரித்தார்.
இச்சம்பவத்தில் காயமடைந்த போலீஸ் உறுப்பினர் தற்போது மலாக்கா மருத்துவமனையில் சிகிச்சை பெற்று வருவதாகவும் அவர் தெரிவித்தார்.
பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
