கோலாலம்பூர், 23 நவம்பர் (பெர்னாமா) -- நவம்பர் 13 ஆம் தேதி தொடங்கி அடுத்தாண்டு மார்ச் மாதம் வரை தொடரும் என்று எதிர்பார்க்கப்படும் வடகிழக்கு பருவமழை காலம் முழுவதும், பொது சுகாதார சேவை தொடரப்படுவதை உறுதி செய்வதற்காக, ஒரு விரிவான செயல் திட்டத்தை, சுகாதார அமைச்சு செயல்படுத்தி வருகிறது.
சேவையின் தொடர்ச்சியை உறுதி செய்தல், அவசர மருத்துவக் குழுக்களைத் திரட்டுதல், பொது சுகாதாரக் கட்டுப்பாடு மற்றும் தற்காலிக நிவாரண மையங்களில் கண்காணிப்பு நடவடிக்கை ஆகியவை இத்திட்டத்தில் அடங்கும் என்று, இன்றுவெளியிட்ட அறிக்கையில் சுகாதார அமைச்சு குறிப்பிட்டுள்ளது.
போதுமான மனிதவளம், உபகரணங்கள் மற்றும் தளவாடங்களுடன், தொடக்கக்கட்ட சுகாதார நிலையங்களும் மருத்துவமனைகளும் உகந்த தயார்நிலையில் உள்ளதாக அவ்வறிக்கையில் கூறப்பட்டுள்ளது
இதனிடையே, வெள்ளத்தால் முக்கிய வசதிகள் பாதிக்கப்பட நேர்ந்தால், அவ்வேளையிலும் சுகாதார சேவை பாதிக்கப்படாமல் இருப்பதை உறுதி செய்ய மாற்று வசதிகளும் அடையாளம் காணப்பட்டுள்ளன.
இதைத் தவிர்த்து, அனைத்து மாநில சுகாதாரத் துறைகளும் புதுப்பிக்கப்பட்ட சொத்துடைமைகள், உபகரணங்கள், வாகனங்கள் மற்றும் தளவாடங்களைக் கொண்டுள்ளதால் அவை எந்த நேரத்திலும் தயாராக உள்ளன.
மேலும் அடிப்படை மருந்துகளுக்கான கையிருப்பும் மூன்று மாத கால அளவிற்கு போதுமானதாக உள்ளதாக அறிக்கையில் விவரிக்கப்பட்டிருந்தது.
இதைத் தவிர்த்து, அடையாளம் காணப்பட்ட அனைத்து தற்காலிக நிவாரண மையங்களும் செயல்படுத்தப்படுவதற்கு முன்னர், அதன் பாதுகாப்பு, தூய்மை மற்றும் இடத்தின் பொருத்தத்தை உறுதி செய்வதற்காக முன்கூட்டியே ஆராயப்படுகின்றது.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 1130 (ஆஸ்ட்ரோ 502)
