கோத்தா கினபாலு, 22 நவம்பர் (பெர்னாமா) -- இயற்கை அழகு, கலாச்சார பன்முகத்தன்மை மற்றும் தனித்துவமான உள்ளூர் வாழ்க்கை முறை ஆகியவற்றால் சபா மாநிலம் சிறந்த சுற்றுலா தளமாகவும் விளங்குகிறது.
இந்நிலையில், 17-வது அம்மாநிலத் தேர்தலுக்காக அங்கே மேற்கொள்ளப்படும் பணிகளும் சுற்றுலா பயணிகளை வெகுவாக கவர்ந்துள்ளன.
தற்போது அம்மாநிலம் தேர்தல் காலமாக மாறியிருந்தாலும், சுற்றுலாப் பயணிகளின் வருகைக்கு அது எவ்வகையிலும் இடையூறாக இல்லை.
இம்முறை சுற்றுலாப் பயணிகள், அரசியல் கொடிகள், சுவரொட்டிகள், பதாகைகள் மற்றும் விளம்பரப் பலகைகள் மூலம் வரவேற்கப்படுகின்றனர்.
சபாவிற்கு வந்த பிறகே, தேர்தலைப் பற்றி அறிந்து கொண்டதாகவும், இச்சூழல் தங்களின் நாடுகளை விட வேறுபட்டிருப்பதாக சுற்றுப்பயணிகள் சிலர் தெரிவித்தனர்.
''நிச்சயமாக இந்தியா ஒரு பெரிய நாடு, இன்னும் பல கட்சிகள் உள்ளன. எனவே நாம் இன்னும் பல சுவரொட்டிகளையும் கொடிகளையும் பார்க்க வேண்டும். ஆனால் நீங்கள் அதை மிகவும் அழகாகவும் நேர்த்தியாகவும் வைத்துள்ளீர்கள். அவை அழகாக வைக்கப்பட்டுள்ளன. எனவே நான் முன்பு இங்கு வந்திருந்தால், இந்த மாற்றத்தைக் கண்டிருக்க மாட்டேன். நான் பாராட்டுகிறேன்'', என்று இந்திய சுற்றுலாப் பயணி சோமா கிருஷ்ணா கூறினார்.
''கொடிகள் அதிகம், என் பெற்றோருக்கும் என்னைப் போலவே ஒரே கருத்துதான். இது மிகவும் விசித்திரமானது, ஏனென்றால் பிரான்சில் இப்படி இருக்காது. சுவரில் நிறைய சுவரொட்டிகள் மட்டுமே இருக்கும். ஆனால் சாலையில் கொடிகள் வைத்திருப்பது போல் இல்லை, மிகவும் வித்தியாசமாக இருக்கிறது'', என்றார் பிரான்ஸ் சுற்றுலாப் பயணி அலெக்சிஸ் லீலிவ்ரே.
இவ்வாண்டு ஜனவரி முதல் ஜூலை மாதம் வரை உள்நாடு மற்றும் அனைத்துலக நாடுகள் உட்பட மொத்தம் 21 லட்சத்து 20,000 சுற்றுப் பயணிகள் சபாவிற்கு வருகை புரிந்துள்ளதாக பதிவு செய்யப்பட்டுள்ளது.
-- பெர்னாமா
பெர்னாமா செய்திகள் நேரலை: இரவு 7 மணி மறுஒளிபரப்பு: இரவு 11:30
(ஆஸ்ட்ரோ 502)
