சபா தேர்தல்: போட்டியிடவிருக்கும் தொகுதியை சபா அம்னோ நாளை தீர்மானிக்கும்

சபா  01 ஆகஸ்ட் (பெர்னாமா) --சபா மாநில தேர்தலில் போட்டியிடவிருக்கும் தொகுதியை சபா அம்னோ நாளை ஞாயிற்றுக் கிழமை நடைபெறவுள்ள கட்சி கூட்டத்தில் தீர்மானிக்கும். 

மாநில தேர்தல் தொடர்பாக, சபா அம்னோ மற்றும் சபா தேசிய முன்னணியின் இலக்கு குறித்து, அந்தக் கூட்டத்தில் கவனம் செலுத்தப் படும் என்று சபா அம்னோவின் தொடர்பு பிரிவுத் தலைவர்  டத்தோ ஶ்ரீ புங் மொக்தார் ராடின் தெரிவித்தார்.

''தொகுதிகளில் போட்டியிடும் விவகாரங்கள் குறித்து நாங்கள் நாளை முடிவு செய்வோம், சபா அம்னோவின் இலக்கு மற்றும் சபா தேசிய முன்னணி வெற்றியை நோக்கி எவ்வாறு பயணிக்கிறது குறித்து தீர்மானம் செய்ய சபா அம்னோ மற்றும் அரசியல் பிரிவுடன் கூட்டம் நடத்துவேன். அனைத்து தொகுதிகளில் போட்டியிடுவது என்பது முக்கியம் அல்ல, நம்மால் எத்தனை தொகுதிகளை வெல்ல முடியும் என்பதே முக்கியம்'', என்று புங் மொக்தார் குறிப்பிட்டார்.

இன்று சனிக்கிழமை பெர்னாமா தொடர்பு கொண்டபோது அவர் இவ்வாறு தெரிவித்தார்.

சபா மக்களுக்கு சிறந்த சேவைகளை வழங்குவதற்கான சரியான நேரம் இது என்று கினபாத்தாங்கான் (KINABATANGAN) நாடாளுமன்ற உறுப்பினருமான புங் மொக்தார் தெரிவித்தார். 

கடந்த 14ஆவது பொதுத் தேர்தலில் 60 மாநில சட்டமன்ற தொகுதிகளில் போட்டியிட்டு அம்னோ 17 தொகுதிகளை வென்றது.

 - பெர்னாமா